Vendimi i jurisë federale
Juria federale në Florida shpalli fajtor Ryan Routh, 59 vjeç, për tentativën për të vrarë Presidentin amerikan Donald Trump gjatë një loje golfi në shtator 2024. Ai u dënua për të gjitha akuzat, përfshirë atentatin ndaj një kandidati presidencial dhe disa vepra të rënda me armë zjarri.
Ngjarja e shtatorit 2024
Incidenti ndodhi më 15 shtator 2024, kur Trump, asokohe kandidat për president, po luante golf në një nga fushat e tij në West Palm Beach, pranë Mar-a-Lago. Agjentët e Shërbimit Sekret gjetën një pushkë gjysmë automatike me dylbi, të fshehur mes shkurreve. Autori u identifikua si Routh, i cili u përpoq të largohej, por u kap pak më vonë. Në vendngjarje u zbuluan gjithashtu shënime që tregonin se ai e kishte planifikuar sulmin prej muajsh.
Në sallën e gjyqit
Pas shpalljes së vendimit, Routh tentoi të vetëdëmtohej me një stilolaps, por u ndalua menjëherë nga marshallët amerikanë. Seanca gjyqësore u shoqërua me sjellje të çuditshme nga i pandehuri, i cili u vetëmbrojt, bëri referenca për Hitlerin e Putinin dhe madje sfidoi Trumpin në një lojë golfi. Megjithatë, provat e FBI-së dëshmuan qartë se atentati ishte real dhe i përgatitur.
Dënimi i mundshëm
Shpallja e dënimit do të bëhet më 18 dhjetor, ndërsa Routh përballet me mundësinë e burgimit të përjetshëm.
Reagime dhe deklarata
Presidenti Trump reagoi duke falënderuar forcat e sigurisë dhe dëshmitarin që ndihmoi në arrestimin e autorit. “Ky ishte një njeri i lig me një qëllim të lig, dhe ata e kapën. Një moment i madh për drejtësinë në Amerikë!”, shkroi ai. Prokuroria e përshkroi Routh si një person që veproi me gjakftohtësi. “Ai kishte gati dhe siguresën e hequr. E kuptoni sa afër ishte ta realizonte?”, deklaroi prokurori John Shipley.
Burimi: Gazeta Express
