Një dietë e përditshme e pasur me ushqime të përpunuara, përfshirë bukën e bardhë të paketuar, mund të shtojë ndjeshëm rrezikun e vdekjes nga kanceri i zorrës së trashë, paralajmëron një studim i fundit i paraqitur nga shkencëtarë amerikanë.
Studiuesit zbuluan se pacientët që konsumonin më shpesh ushqime që nxisin inflamacionin – si mishrat e përpunuar (proshutë, bacon), pijet e gazuara me sheqer dhe karbohidratet e rafinuara – kishin një rrezik 36% më të lartë për të ndërruar jetë nga kanceri, krahasuar me ata që ndoqën një dietë më të balancuar.
Përkundrazi, ushqimet që konsiderohen si anti-inflamatore, si patatet e ëmbla, karotat, kafeja dhe madje edhe pica me përmbajtje domatesh të gatuara, rezultuan se mund të ofrojnë një nivel mbrojtjeje ndaj zhvillimit ose përparimit të kësaj sëmundjeje. Kjo për shkak të përbërësve si likopeni, një antioksidant i fuqishëm që gjendet në domatet e gatuara.
Studimi, që përfshiu mbi 1,600 pacientë të diagnostikuar me kancer të zorrës së trashë të përhapur në gjëndrat limfatike, tregoi gjithashtu se ndikimi i dietës bëhet edhe më i fortë kur kombinohet me aktivitet fizik. Pacientët me dietë më pak inflamatore dhe stil jetese aktiv patën një rrezik vdekjeje 63% më të ulët.
Ekspertët theksojnë se kjo lidhje e fortë mes ushqimit dhe kancerit shton rëndësinë e të ushqyerit të shëndetshëm si një strategji për parandalimin dhe menaxhimin e sëmundjes. Dr. Catherine Elliott nga Cancer Research UK deklaroi se “kur bëhet fjalë për rrezikun ndaj kancerit, ndikimin më të madh e ka dieta e përgjithshme dhe jo një ushqim i vetëm.”
Një tjetër studim paralel i paraqitur në konferencën ASCO, që analizoi të dhënat e mbi 700 pacientëve midis viteve 2015 dhe 2023, gjeti se dieta anti-inflamatore uli rrezikun e përhapjes ose rikthimit të kancerit me 38%. Nga ana tjetër, ushqimet ultra-të përpunuara thuajse dyfishuan e gjysmë rrezikun.
Kanceri i zorrës së trashë, i njohur më parë si një sëmundje që prek zakonisht moshat e mëdha, po shfaqet gjithnjë e më shumë edhe tek të rinjtë – një zhvillim shqetësues që po i shtyn shkencëtarët të rishqyrtojnë ndikimin e stilit të jetesës moderne në shëndetin afatgjatë.