Një kanaçe me qiqra çdo ditë mund të jetë një zgjidhje e thjeshtë dhe efektive për të ulur nivelin e kolesterolit të lartë — një faktor kryesor që rrit rrezikun për sëmundje të zemrës dhe goditje në tru.
Sipas një studimi të fundit të realizuar nga Instituti i Teknologjisë në Illinois, shtimi i bishtajoreve të konservuara në dietën e përditshme për tre muaj ka ndihmuar në normalizimin e niveleve të yndyrnave të dëmshme në gjak. Përveç qiqrave, edhe fasulja e zezë tregoi rezultate të ngjashme në uljen e kolesterolit.
Profesoresha Morganne Smith, autore e studimit, këshillon që njerëzit me kolesterol të lartë të zëvendësojnë ushqimet më pak të shëndetshme me bishtajore, qofshin ato të konservuara, të thata apo të ngrira. “Bishtajoret mund të përfshihen lehtësisht në shumë vakte, si supa, sallata apo si shoqëruese me drithëra si orizi,” shpjegon ajo.
Ekspertët shpjegojnë se bishtajoret ndihmojnë në rritjen e baktereve të dobishme në zorrë, të cilat ndihmojnë në largimin e kolesterolit të dëmshëm nga trupi.
Kolesteroli është një substancë yndyrore e nevojshme për funksionimin normal të trupit, por ka dy lloje: HDL (kolesteroli i mirë) dhe LDL (kolesteroli i keq). Sasia e lartë e LDL-së lidhet me formimin e pllakave në arterie, të cilat mund të bllokojnë rrjedhën e gjakut dhe të shkaktojnë sulme në zemër ose goditje në tru.
Në Mbretërinë e Bashkuar, rreth 6.3 milionë njerëz vuajnë nga kolesteroli i lartë, një gjendje që nëse nuk trajtohet, mund të çojë edhe në diabet tip 2 dhe sëmundje të zemrës.
Studimi 12-javor përfshiu 72 persona me para-diabet, të cilët u ndanë në tre grupe: ata që konsumuan fasule të zeza, qiqra apo oriz (si grup kontrolli). Matjet e niveleve të kolesterolit, sheqerit dhe inflamacionit u kryen në fillim, në mes dhe në fund të periudhës së studimit.
Rezultatet treguan se personat që hanin qiqra çdo ditë panë një ulje të ndjeshme të kolesterolit total, nga 200.4 në 185.8 mg/dl. Ndërkohë, ata që konsumuan fasule të zeza shfaqën ulje të inflamacionit, një faktor shtesë rreziku për sëmundjet kronike.
“Studimi ynë tregon se bishtajoret janë një mjet i rëndësishëm në uljen e kolesterolit dhe inflamacionit, veçanërisht tek ata me para-diabet,” përfundon Profesoresha Smith.
Ajo gjithashtu paralajmëron që konsumatorët të kenë kujdes me përbërësit shtesë si kripa dhe sheqeri, që ndodhen shpesh në produktet e konservuara, pasi ato mund të dëmtojnë shëndetin e zemrës.
Në Mbretërinë e Bashkuar, pothuajse 6 milionë persona kanë diabet, kryesisht tip 2, ndërsa rreth 1.2 milionë prej tyre nuk e dinë ende që vuajnë nga kjo sëmundje.