Ministri në detyrë për Komunitete dhe Kthim i Kosovës, Nenad Rashiq, dhe kryetari i komunës së Leposaviqit, Lulzim Hetemi, kanë rënë dakord që të mos ketë dëbim me forcë nga shtëpitë për 17 familjet që ndërtuan pa leje shtëpi në fshatin Leshak në veri të Kosovës para rreth dy dekadash, sipas një deklarate nga Ministria.
Ministria e Punëve të Brendshme e Kosovës, e cila pretendon se këto shtëpi janë ndërtuar në tokën në pronësi të saj, kishte njoftuar në fund të majit përmes komunës së Leposaviqit që pronarët kishin afat deri më 28 qershor për t’i prishur ato vetë, në të kundërtën do të angazhohej një kompani për shembjen e tyre në kurrizin e pronarëve. Ministria për Komunitete dhe Kthim i ka pranuar publikisht faktin që shtëpitë janë ndërtuar në tokën e MPB-së së Kosovës, por thekson se synon të respektojë kërkesën dhe të zgjidhë çështjen duke shfrytëzuar të gjitha opsionet ligjore dhe administrative.
Nuk është caktuar ende një zgjidhje specifike, por ministri Rashiq dhe kryetari Hetemi po punojnë për të gjetur një zgjidhje të përhershme që të mos dëmtohet asnjëra palë. Rashiq ka theksuar se qëllimi është që asnjë qytetar të mos ndihet i kërcënuar ekzistencialisht nga këto veprime dhe premtoi se do të punojë për rregullimin e situatës. Në një raportim të Radio Evropa e Lirë më 6 qershor, disa nga familjet e prekura shprehen se nëse MPB-ja e Kosovës do të vazhdonte me planin për rrënim, ata do të mbeteshin pa strehë.
Në fqinjësi të shtëpive të ndërtuara pa leje është ndërtuar gjithashtu një stacion policie në vitin 2024, me pjesëmarrjen e kryeministrit të Kosovës, Albin Kurti në ceremoninë e inaugurimit, veprim ky që është përshkruar nga zyrtarët në Beograd si ‘vazhdim i okupimit politik dhe policor’ të veriut të Kosovës. Leshaku është pozicionuar rreth 10 kilometra larg nga pika kufitare Jarinje me Serbinë.
Në të gjithë territorin e Kosovës egzistojnë mbi 350,000 objekte të ndërtuara pa leje, prej të cilave rreth 40,000 ndodhen në kryeqytetin Prishtinë. Procesi i legalizimit po vazhdon me ngadalësi për shkak të zvarritjes së procedurave dhe mungesës së interesit të qytetarëve. Në gusht të 2023, u miratua një ndryshim ligjor që lejon shtyrjen e afatit për dorëzimin e kërkesave për legalizim deri në fund të vitit 2025, pas të cilit do të përfshihen në listën e objekteve për prishje objektet që nuk janë legalizuar.