Kompania kosovare ‘Enternet’ sot ka bërë të ditur përmes një komunikate për shtyp arsyet e mbylljes së pikave të saj të shitjes, duke theksuar se vendimi i Ministrisë së Financave për ndalimin e shitjes së arkave fiskale ka qenë shkaku kryesor.
Si rezultat i një Udhëzimi Administrativ të ri nga Ministria e Financave, të cilit i është ndaluar shitja e arkave fiskale dhe ofrimi i shërbimeve të ngjashme, ‘Enternet’ raporton një rënie drastike në të ardhurat, që arrin deri në 80%. Përballë kësaj situate, kompania pohoi po ashtu se është e detyruar të shkurtojë mbi 80% të stafit të saj. Sipas tyre, ky vendim ka ardhur edhe pse kompanisë i është rinovuar licenca e operimit deri në vitin 2028, për të cilën kanë përmbushur shumë kërkesa dhe kanë bërë investime të konsiderueshme, që përfshijnë rritjen e stoqeve dhe zhvillimin e programeve të reja me një vlerë prej 2.5 milionë euro.
Komunikata vëren se ky vendim jo vetëm që po e rrezikon stabilitetin e sistemit të ndërtuar me kujdes të madh dhe investime të mëdha nga ekspertë vendorë dhe të huaj, por edhe mund të çojë në rritjen e evazionit fiskal, gjë që ndikon negativisht në të ardhurat e buxhetit të shtetit.