Në një vendim të siguruar nga ‘Betimi për Drejtësi’, Këshilli Gjyqësor i Kosovës (KGjK) ka lejuar në një mbledhje të mbajtur elektronikisht më 27 qershor, që kryetarët e Gjykatës Supreme, Gjykatës së Apelit, Gjykatës Komerciale dhe Gjykatës Themelore në Prishtinë, të vlerësojnë kushtet e punës. Ky vlerësim do të përfshijë shqyrtimin e mundësisë për pezullimin apo reduktimin e punës si pasojë e temperaturave të larta në Pallatin e Drejtësisë.
Sipas vendimit, ‘Autorizohen kryetarët e Gjykatës Supreme, Gjykatës së Apelit, Gjykatës Komerciale dhe Gjykatës Themelore në Prishtinë që të vlerësojnë kushtet e punës (gjendjen me temperaturat e larta) në Pallatin e Drejtësisë dhe, varësisht nga vlerësimi, të vendosin për reduktimin e punës apo pezullimin deri në përmirësim të gjendjes’, thuhet në dokumentin e marrë.
KGjK ka njoftuar se pas marrjes së të dhënave dhe vlerësimeve rreth kushteve të vështira për shkak të temperaturave të larta kontinuale, në mënyrë që të ruhet shëndeti dhe mirëqenia e të punësuarve, është vendosur që veprimet e mëtejshme të bëhen në përputhje me këtë autorizim.