Diddy duket i vendosur të heqë dorë nga imazhi i tij si ‘djalë i keq’, pasi raportohet nga TMZ se reperi, i cili aktualisht është në Qendrën Federale të Paraburgimit në Brooklyn, New York, ka filluar psikoterapi dhe po merr pjesë në programe vetëpërmirësimi. Vetëm disa ditë më parë, ai u shpall i pafajshëm për trafikim seksual dhe fajtor për transportimin e dy grave për qëllime imorale, në një gjyq që tërhoqi vëmendjen e madhe të medias.
Sipas burimeve të njëjta, Combs po merr pjesë në programin STOP, i cili ka si qëllim parandalimin e abuzimit seksual, dhunën në familje dhe dhunën në marrëdhëniet personale. Poashtu, ai është pjesë e programit të rehabilitimit nga droga të Dr. Harry K. Wexler, program ky të cilin e kishte nisur që para arrestimit të tij në shtator të vitit 2024 dhe vazhdon të marrë pjesë edhe gjatë qëndrimit në burg.
Në këto kushte, burimet pranë producentit dhe reperit 55-vjeçar theksojnë se ai është duke u përpjekur të ndryshojë drejtimin e jetës së tij dhe të bëjë hapat e parë drejt shpengimit personal. Siç raportohet, qëllimi i tij është të demonstrojë një vullnet të mirë, në pritje të shpalljes së dënimit të tij. Të afërmit e tij pohojnë se Diddy është duke punuar fort për të përmirësuar veten dhe flasin për një ‘rrugë shpengimi’. Megjithatë, ekzistojnë edhe qëndrime më cinike, ku disa sugjerojnë se përfshirja e tij në këto programe ka për qëllim të bindë gjyqtarin për ndërmarrjen serioze të tij për një ndryshim.
Në të njëjtën linjë, nuk është e pazakontë që të dënuarit në fushën kriminale të marrin pjesë në programe të tilla para se të shpallen fajtorë, me synimin për të treguar një imazh të pendimit dhe ndryshimit. Prokurorët federalë kanë rekomanduar një dënim prej katër vitesh burgim për Diddy, me vendimin përfundimtar që do të merret nga gjyqtari Arun Subramanian, i cili pritet të shpallë dënimin më 3 tetor.