Presidentja e Komisionit Evropian, Ursula von der Leyen, viziton sot Bosnjën dhe Hercegovinën, si pjesë e një turi në Ballkanin Perëndimor që synon të theksojë përkrahjen e BE-së për rrugëtimin e rajonit drejt anëtarësimit dhe integrimit gradual në tregun e vetëm, si edhe të diskutojë Planin e Rritjes së BE-së për Ballkanin Perëndimor.
Vizita në Bosnjë dhe Hercegovinë
Gjatë qëndrimit në Bosnjë dhe Hercegovinë, von der Leyen do të vizitojë Qendrën Përkujtimore të Srebrenicës. Më pas, ajo do të zhvillojë takim me anëtarët e Presidencës së Bosnjës dhe Hercegovinës në Sarajevë, ndërsa më vonë pritet të takohet edhe me Kryetaren e Këshillit të Ministrave, Borjana Krishto, sipas njoftimit të Delegacionit të BE-së në BeH.
Ndalesa në Kosovë
Në vijim të turit, Presidentja e Komisionit Evropian do të qëndrojë edhe në Kosovë. Sipas agjendës së publikuar nga Komisioni Evropian, gjatë vizitës ajo do të takohet me presidenten Vjosa Osmani dhe me kryeministrin në detyrë, Albin Kurti.
Burimi: Delegacioni i BE-së në BeH dhe Komisioni Evropian