Kurti i drejtohet BE-së për “Dialog Strategjik”
Jo më ShBA-së, por Bashkimit Evropian. Albin Kurti, në cilësinë e deputetit, i ka kërkuar BE-së nisjen e një “Dialogu Strategjik” pas takimit me Presidenten e Komisionit Evropian, Ursula von der Leyen. Takimi u zhvillua në ambientet e Kuvendit të Kosovës, jo në Zyrën e Kryeministrit, siç është konfirmuar nga BE me letër zyrtare. Vetë “Dialogu Strategjik” ishte masa ndëshkuese më e fundit që Kosova e mori nga ShBA rreth një muaj më parë, e artikuluar drejtpërdrejt nga Departamenti amerikan i Shtetit në adresë të Kurtit.
Megjithatë, një format i tillë me BE-në shihet si politikisht (dhe rrjedhimisht juridikisht) i parealizueshëm, për shkak të pesë shteteve anëtare që ende nuk e njohin Kosovën. Kërkesën, Kurti thotë se ia ka përcjellë me letër znj. von der Leyen dhe e bëri publike me një postim. Presidentja e Komisionit nuk ka komentuar mbi këtë kërkesë.
Kosova ndërkohë vijon të jetë nën masa të BE-së prej gati tre vitesh: i është pezulluar dialogu politik në kuadër të Marrëveshjes së Stabilizim-Asociimit (MSA), ndërsa aplikimi për statusin e vendit kandidat, dorëzuar afro tre vite më parë, mbetet i pambyllur në sirtarë.
Çfarë propozoi Kurti
Kurti njoftoi se i ka dorëzuar znj. von der Leyen tre letra zyrtare për të nisur dialogë sektorialë në këto fusha kyçe: bujqësi, teknologji të informacionit dhe komunikimit (TIK), si dhe industrinë e mbrojtjes.
Masat e BE-së ndaj Kosovës
Masat e ashtuquajtura “ndëshkuese” të BE-së janë në fuqi që prej instalimit të kryetarëve shqiptarë në katër komunat me shumicë serbe në veri. Ato përfshijnë pezullimin e mbi 600 milionë eurove për projekte komunale jetike, ndërprerjen e dialogut të nivelit të lartë politik dhe bllokimin e disa proceseve nën MSA. Masat parashikohet të mbeten deri në rikthimin e përfaqësimit politik të komunitetit lokal përmes zgjedhjeve dhe të zgjedhurve legjitimë.
Qëndrimi i von der Leyen
Ursula von der Leyen nuk e komentoi publikisht kërkesën e Kurtit. Ajo kërkoi shtensionim në veri dhe krijimin e mekanizmave institucionalë që do t’i mundësonin Kosovës të përfitonte nga Plani i Rritjes i BE-së, prej të cilit Kosova aktualisht është jashtë, si pasojë e mosratifikimit përkatës në Kuvend.
Pezullimi amerikan i Dialogut Strategjik
Departamenti i Shtetit konfirmoi së fundi se pezullimi i Dialogut Strategjik Kosovë–ShBA bazohet tërësisht në veprimet e qeverisë kujdestare të Kosovës. Zëdhënësi theksoi se nuk ka lidhje me Serbinë apo aktorë të tjerë të jashtëm dhe se qëndrimi i ShBA-ve i është komunikuar qartë Kryeministrit. Shtetet e Bashkuara, tha ai, mbeten mike të afërta të popullit të Kosovës, por presin punë konstruktive për stabilitet dhe siguri.
Çfarë tha Kurti gjatë vizitës në ShBA
Gjatë një takimi me nxënës në ShBA, Kurti bëri vlerësime që u kritikuan gjerësisht, duke sugjeruar se ShBA-të po kundërshtojnë sundimin e ligjit dhe sovranitetin në veri të Kosovës, çka sipas tij lidhet me interesin amerikan për ta larguar Serbinë nga orbita e Moskës. Ai shtoi se mbajtja e Beogradit të kënaqur në kurriz të Kosovës “nuk duhet të jetë problemi i tij”, duke theksuar se përfaqëson interesat e Republikës së Kosovës dhe se kërkesat për të qenë “më i butë” ndaj Beogradit nuk përkojnë me këtë mandat.
Burimi: Nacionale