Kryetari i Odës së Farmacistëve të Kosovës, Kadri Bytyqi, ka vlerësuar se gjendja me listën esenciale të barnave në sistemin publik shëndetësor mbetet e pakënaqshme. Sipas tij, edhe pse buxheti qeveritar është rritur, mungesat e barnave në SHSKUK dhe në spitalet rajonale janë shtuar ndjeshëm.
Mungesat në listën esenciale të barnave
Për Ekonomia Online, Bytyqi tha se mungesat kanë shënuar rritje mbi 200% krahasuar me vitet e kaluara, duke e cilësuar situatën alarmante dhe një problem serioz që kërkon ndërhyrje institucionale. Ai theksoi se “matematika” nuk qëndron: buxheti i qeverisë është rreth 100% më i lartë se para tre vitesh, ndërsa mungesat janë rritur mbi 200%. Sipas tij, kjo tregon për një problem të madh që dikush duhet ta adresojë dhe ta zgjidhë.
Kërkesë për hetime rreth përpilimit të listës
Bytyqi ngriti shqetësime edhe për procesin e përpilimit të Listës Esenciale të Barnave, duke thënë se ka pasur paqartësi dhe konfuzion. Sipas tij, duhej të zhvilloheshin hetime së paku administrative e institucionale, që nga njësitë kërkuese dhe përpiluesit e listës, e deri te niveli kryesor i administratës publike – përfshirë sekretarin e përgjithshëm të ministrisë përkatëse – për të qartësuar çfarë ka ndodhur me këtë proces. Ai shtoi se fakti që buxheti është dukshëm më i madh, ndërsa mungesat janë më të larta se viteve të mëparshme, e vërteton këtë paqartësi.
Ligji për unifikimin e çmimeve
Duke u ndalur te Ligji për unifikimin e çmimeve të barnave, Bytyqi vlerësoi se ideja ishte e menduar mirë, por zbatimi nuk ka prodhuar rezultatet e pritura. Në përgjithësi, çmimet nuk janë ulur; një gamë e caktuar barnash ka pësuar rënie, por në tërësi çmimet kanë mbetur afërsisht të njëjta ose, në disa raste, janë rritur dukshëm.
Ankesat për ndryshimet e shpeshta të çmimeve
Ai tha se si pasojë e këtij ligji janë shtuar ankesat për ndryshimet e shpeshta të çmimeve, për shkak të periudhave të rideklarimit. Ka pasur raste kur një bar është blerë me 2 euro dhe pas dy muajsh ka kushtuar 3.50 euro – një ndryshim i madh që i vë farmacistët përballë pakënaqësive të qytetarëve. Bytyqi nënvizoi se përgjegjësia nuk është e farmacistëve, por barra e shpjegimit u bie atyre, të cilët punojnë me përkushtim në dobi të pacientëve dhe shëndetit publik.
Burimi: Ekonomia Online