Prokuroria Speciale e Kosovës ka ngritur aktakuzë ndaj 21 personave për masakrën në Reçak, ku u vranë 45 civilë. Prokuroria ka propozuar që procesi të mbahet në mungesë, pasi të dyshuarit konsiderohen të paarritshëm për organet e drejtësisë së Kosovës.
Aktakuza dhe të pandehurit
Ndaj O.S., R. M., K.J., G.R., Zh.T., B.J., M.L., R.M., D.Gj., B.M., D.J., M.Sh., D.A., S.V., B.M., Z.S., M.J., G.P., D.N., Ç.A. është ngritur aktakuzë për veprën penale krim lufte kundër popullatës civile. Ata akuzohen se gjatë një operacioni të forcave policore serbe vranë 42 civilë në Reçak të Shtimes.
Sipas aktakuzës, në kohën e luftës, të pandehurit, si pjesëtarë të ushtrisë së ish-Jugosllavisë, të Brigadës 243 të Mekanizuar të Armatës së Tretë (e njohur si Korpusi i Prishtinës), si dhe të Ministrisë së Punëve të Brendshme të Serbisë, kanë kryer edhe trajtime çnjerëzore, shkatërrim pronash, dëbime masive dhe spastrim etnik ndaj popullsisë civile.
Si u zhvillua operacioni në Reçak
Prokuroria thotë se të pandehurit e rrethuan fshatin Reçak nga zonat e njohura si Pishat, Gështenjat dhe Çesta. Më pas e granatuan fshatin, kryen kontrolle derë më derë dhe i ndanë burrat nga gratë e fëmijët, duke i detyruar këta të fundit të largoheshin, ndërsa burrat e ndaluar i ekzekutuan.
Hetimet kanë vërtetuar se ndaj civilëve është ushtruar dhunë fizike, përfshirë rrahje me kondakë armësh, shqelma, dru, zinxhirë dhe mjete të tjera të forta. Si pasojë e operacionit, afro 20 mijë civilë nga Reçaku, Topill, Petrovë, Kraisht, Mullapolc dhe Dremjak u dëbuan nga shtëpitë e tyre.
Gjykimi në mungesë dhe baza ligjore
Kërkesa e Prokurorisë për gjykim në mungesë bazohet në ndryshimet e fundit në Kodin e Procedurës Penale. Gjykime të tilla lejohen vetëm pasi prokuroria dhe gjykata të kenë shteruar të gjitha mjetet për të siguruar praninë e të akuzuarve. Kodi parasheh që personat e gjykuar në mungesë kanë të drejtë për rigjykim pa asnjë kusht në momentin e arrestimit.
Dokumentimi ndërkombëtar dhe pasojat
Krimet në Reçak u dokumentuan nga William Walker, atëherë shef i Misionit Verifikues të OSBE-së. Pas masakrës, NATO ndërmori sulme kundër caqeve ushtarake dhe policore në ish-Jugosllavi; pas 78 ditësh, bombardimet u ndërprenë me miratimin e Rezolutës 1244 të Këshillit të Sigurimit të OKB-së. Ndërhyrja e NATO-s mundësoi kthimin në shtëpi të mbi 800 mijë refugjatëve dhe personave të zhvendosur brenda e jashtë Kosovës.
Shifrat e luftës dhe veprimet e fundit
Gjatë luftës në Kosovë u vranë mbi 13 mijë civilë dhe mijëra të tjerë u zhdukën. Rreth 1.600 persona vazhdojnë të jenë të pagjetur, shumica shqiptarë. Vitet e fundit, Kosova ka shtuar numrin e aktakuzave në mungesë për krime lufte. Së fundi, Prokuroria Speciale ngriti aktakuzë në mungesë kundër 21 të dyshuarve për dëbimin me forcë të mbi 800 mijë civilëve shqiptarë nga Kosova gjatë luftës.
Burimi: REL