Gazetarja sportive Albana Bejko ka ndarë për herë të parë historinë e përndjekjes së saj nga mjeku kosovar Behar Kamberi Bejko. Sipas saj, ngacmimi kishte nisur më shumë se një vit më parë dhe situata u rëndua aq sa iu desh të kërkonte ndihmë nga institucionet. Pas kallëzimit, autoritetet ndërhynë dhe arrestuan mjekun.
Rrëfimi i ngjarjes
Bejko tregoi se një nga momentet më tronditëse ndodhi në ambientet e punës, kur personi iu afrua dhe i kërkoi të pinin kafe. “Reagimi im ishte instinktiv, i frikësuar; i thashë: ‘të lutem, më lër rehat'”, rrëfen ajo. Sipas gazetares, periudha më intensive e përndjekjes ka qenë nga qershori i vitit të kaluar deri para pak ditësh, pas së cilës ajo telefonoi policinë.
Thirrje për të tjera gra
Gazetarja theksoi se vendimi për ta bërë publik rastin erdhi për të inkurajuar edhe gra të tjera që përballen me situata të ngjashme të mos heshtin dhe të kërkojnë mbrojtje ligjore.
Mesazhet e dërguara
Së bashku me dëshminë, Bejko publikoi edhe disa prej mesazheve kërcënuese dhe ngacmuese që, sipas saj, i janë dërguar vazhdimisht. Në to, ai i drejtohej si “burri i saj i ëndrrave”, i shprehte “dashuri të madhe” dhe i kërkonte martesë.
“Përshëndetje Albanë nga Behari. Unë jam burrë ideal për ty. Jam doktor intelektual, gentleman, i bukur dhe i sinqertë. Ne të dy gjithnjë kemi komunikuar dhe do të komunikojmë mirë dhe shëndetshëm. Kam gjendje të mirë financiare dhe shëtis botën. Këto janë tiparet që përmbush kështu që mos hezito më. Por eja martohemi dhe jetojmë së bashku në një banesë këtu në Prishtinë, por edhe në Tiranë. Ku ti përsëris krejt gjërat ke me i pas dhe me i çu në vend, asgjë s’ka për të munguar. Ti do vazhdosh të punosh si tani. Albanë më merr në konsideratë kur unë jam mashkull ideal që të bëj propozimpër martesë. Pres reflektim nga ti”.
“Përshëndetje. Tashmë pasi që ne po njihemi që një kohë të gjatë dhe kështu kemi biseduar live kohë pas kohe, kemi bërë foto, kemi biseduar në telefon dhe të kam shkruar në email. Unë kam një ftesë për kafe me ty. Me qellim që të vazhdojmë komunikimin dhe të diskutojmë për së rrafshi në tavolinë. Pasi që edhe ti ma ke konfirmuar kërkesën që na dy të pimë kafe së bashku. Me rëndësi është që edhe ti me qenë e kënaqur dhe me ndje veten tande mirë. Kur të konvenon dhe kur është mirë për ju. Jam në pritje, më lajmëro. Behari, Albana, më të mirat”.
“Përshëndetje Albana nga Behari. Është kënaqësi që u takova mbrëmë dhe u njoha për së afërmi me ty. Nderimi im është që bëra foto me ty. Shumë jam i lumtur që fola me ty dhe të çmoj shumë, moj vajza më e bukur e Shqipërisë. Dhe shpresoj që së shpejti të shihemi dhe të pimë edhe nga një kafe. Të ftoj me ardh në Prishtinë. Ti gjithmonë më ke pëlqyer si person dhe besoj që do të kemi të mira. Me respekt nga Behari. Të dua shumë Albana”.
Burimi: Rrëfimi publik i gazetares Albana Bejko dhe mesazhet e publikuara prej saj.