Kandidati i PDK-së për Asamblenë Komunale të Prishtinës, Andi Belegu, ka shpalosur programin e tij politik, të mbështetur në tri shtylla kryesore: punë, kujdes dhe zhvillim së bashku me njerëzit. “Programin e kemi ndërtuar mbi një parim të thjeshtë: Prishtina duhet të jetë qytet që punon, kujdeset dhe rritet përkrah qytetarëve të saj,” deklaroi ai.
Planifikimi urban dhe mjedisi
Belegu theksoi se do të ketë fokus në ndalimin e ndërtimeve të pakontrolluara dhe jashtë planit, si dhe në krijimin e më shumë hapësirave të gjelbra e parqeve në çdo lagje. Ai premtoi hapësira publike për fëmijët, prindërit dhe të moshuarit, duke synuar një qytet të pastër, të gjallë dhe të ndërtuar për një jetë më cilësore.
Transporti dhe siguria urbane
Programi përfshin zhbllokimin e trafikut dhe modernizimin e transportit publik, me rrugë më të sigurta, ndriçim në çdo lagje dhe rend urban që vë qytetarin në qendër.
Ekonomia lokale
Në planin ekonomik, ai paralajmëroi mbështetje për ekonominë vendore, për bujqit, gratë sipërmarrëse dhe artizanët që mbajnë gjallë jetën e qytetit. “Zhvillimi fillon me punën e ndershme të njerëzve të zakonshëm,” u shpreh Belegu.
Shërbimet komunitare dhe shëndetësia
Ai njoftoi për ngritjen e Qendrave Multifunksionale në lagje dhe fshatra, si hapësira për sport, kulturë, shërbime dhe bashkëjetesë komunitare. Po ashtu, parashihet Spitali i Qytetit, me kujdes shëndetësor cilësor dhe të qasshëm për të gjithë.
Arsimi dhe përfshirja
Belegu theksoi ndërtimin e shkollave dhe çerdheve të reja në të gjitha lagjet dhe fshatrat e Prishtinës, si dhe një kujdes të veçantë për fëmijët me nevoja të veçanta: logopedë në Qendrat e Mjekësisë Familjare, më shumë asistentë edukativë dhe mbështetje për familjet e tyre. “Një qytet i drejtë matet me kujdesin ndaj më të ndjeshmëve,” shtoi ai.
Përmbyllja
“Ky është vizioni ynë për një Prishtinë punëtore, të kujdesshme dhe dinjitoze që ecën përpara. Koha e Prishtinës është tani,” përfundoi Belegu.
Burimi: Gazeta Express