Diego López, futbollisti i Valencias dhe i kombëtares Sub-21, aktualisht është i përqendruar në Europianin Sub-21 në Sllovaki. Ai ka një propozim për rinovimin e kontratës, i cili është ende në diskutim me agjentin e tij. Ky nuk është rasti i vetëm, pasi edhe të tjerë bashkëlojtarë të tij në Valencia ndodhen në situata të ngjashme. Klubi ka bërë lëvizje për Javi Guerra, ka njoftuar agjentin e Mosquera për një rinovim të mundshëm dhe po ashtu po zhvillon bisedime për të përmirësuar dhe zgjatur kontratën e César Tárrega, e cila skadon në 2028.
Në ndeshjen e parë të Europianit kundër Sllovakisë, të katër lojtarët e Valencias ishin titullarë, duke arritur një fitore të vështirë në minutat e fundit të ndeshjes. Para ndeshjes së radhës kundër Rumanisë, Diego López u pyet në lidhje me spekulimet rreth tregut të transferimeve dhe ndikimin e tyre në përqendrimin e lojtarëve. Ai u shpreh qartë se këto nuk janë shqetësuese. “Jo, aspak. Nuk na shpërqendrojnë. Me përvojën që po kalojmë këtu në Europian, shoh që të gjithë janë shumë të fokusuar për të lundruar në të njëjtën drejtim. Nuk kemi asnjë lloj shpërqendrimi, jemi të përqendruar në ndeshjen e nesërme dhe në Europian. Çdo lojtar ka situatën e tij, por do ta zgjidhë më vonë”, deklaroi ai në një konferencë për shtyp.
Diego López, i cili ka mbyllur sezonin e tij më të mirë në Primera División me tetë gola dhe pesë asistime, vlerësoi lart skuadrën e formuar nga trajneri për të përmbushur pritshmëritë që e shohin Spanjën si një nga favoritet kryesore. “Kemi një grup shumë të mirë. Duhet të vazhdojmë të rritemi dhe të përmirësohemi. Ndeshja kundër Sllovakisë ishte e mirë, por kemi akoma gjëra për të përmirësuar. Ekipi ka një ide të qartë dhe do të përpiqemi të japim maksimumin”, shtoi ai.
Pas fitores dramatike në minutën e 90-të falë një goli nga César Tárrega, ku merrnin pjesë edhe Javi Guerra dhe Cristhian Mosquera, Diego Lopez e përshkroi Tárregan si “një person i mrekullueshëm dhe një luftëtar në fushë” dhe shtoi se ai meriton çdo gjë të mirë që i ndodh.