FBI Vazhdon Kërkimin për Informacion mbi Rrëmbimin e Ish-Agjentit Levinson, Përfshirë Ish-Ambasadorin Iranian në Shqipëri

Zyra e FBI-së në Washington njoftoi të hënën për publikimin e posterave që kërkojnë informacione për tre zyrtarë të lartë të inteligjencës iraniane, të cilët dyshohen për përfshirje në rrëmbimin e ish-agjentit të pensionuar të FBI-së, Robert A. “Bob” Levinson, në ishullin Kish të Iranit më 9 mars 2007. Ky publikim është pjesë e hetimeve të vazhdueshme të FBI-së ndaj zyrtarëve iranianë për rolin e tyre në rrëmbimin e Levinson dhe përpjekjet e Iranit për të mbuluar përgjegjësitë. Njëri nga të dyshuarit është ish-ambasadori iranian në Shqipëri, i larguar nga vendi në dhjetor 2018 për arsye të ‘dëmtimit të sigurisë kombëtare’. Reza Amiri Moghadam, njihet tani si ambasadori iranian në Pakistan dhe më parë ka qenë drejtues i njësisë së operacioneve të Ministrisë së Inteligjencës dhe Sigurisë së Iranit (MOIS), ku të gjithë agjentët e MOIS-it në Evropë i raportonin atij në Teheran. Taghi Daneshvar është gjithashtu officer i lartë në MOIS, i angazhuar në aktivitete kundërspiunazhi, ndërsa mbikëqyri punën e një tjetri, i njohur si Mohammad Baseri, në periudhën kur Bob Levinson u zhduk. Gholamhossein Mohammadnia, i cili ka qenë zëvendës i lartë i MOIS dhe gjithashtu ambasador në Shqipëri në 2016, është përjashtuar nga Shqipëria në dhjetor 2018 për ‘dëmtim të sigurisë kombëtare’. Ai ka tentuar të hedhë fajin për zhdukjen e Bobit mbi një grup terrorist në rajonin e Baluchistanit të Pakistanit, për të hequr përgjegjësinë nga qeveria iraniane. ‘Këta tre oficerë të inteligjencës janë ndër të dyshuarit që mundësuan rrëmbimin e Bobit në 2007 dhe mbulimin e ngjarjes nga qeveria iraniane. Është e mundur që Bobi ka vdekur më vonë në robëri,’ deklaroi ndihmësdrejtori i Zyrës së FBI-së në Washington, Steven Jensen. ‘FBI do të vazhdojë përpjekjet e saj të pandërprera për të mbajtur përgjegjës çdo individ të përfshirë në rrëmbimin e tij.’ Qeveria iraniane ka mohuar vazhdimisht çdo dijeni për vendndodhjen e Bobit, ndërsa zyrtarë të lartë të inteligjencës kanë autorizuar rrëmbimin dhe mbanjen e tij peng dhe kanë nisur një fushatë dezinformimi për të larguar fajin nga regjimi iranian. Në mars të 2025, Zyra e Kontrollit të Aseteve të Huaja e Departamentit të Thesarit të SHBA-së ka caktuar Moghadam, Daneshvar dhe Mohammadnia për rolet e tyre në rrëmbimin e Bobit. Ky përcaktim vjen pas vendimeve te mëparshme për oficerët e tjerë të MOIS-it. Moghadam, Daneshvar dhe Mohammadnia dyshohen për përfshirjen e tyre në rrëmbimin dhe ndalimin e Levinsonit dhe për përpjekjet e Iranit për ta fshehur atë. FBI-ja ofron një shpërblim prej deri në 5 milionë dollarë për çdo informacion që çon në gjetjen dhe kthimin e Bobit.