Reagimi i Hansi Flick
Trajneri i Barcelonës, Hansi Flick, tha se humbja 4-1 në fushën e Sevillas në La Liga erdhi si pasojë e “gabimeve serioze” të skuadrës së tij dhe jo për shkak të sistemit të lojës. “Duhet të fokusohemi te pjesa e parë, të mësojmë nga ajo, por gjëja më e rëndësishme është reagimi,” u shpreh ai pas ndeshjes. “Këtë u thashë edhe lojtarëve. Edhe me këtë humbje dhe emocionet që sjell, është thelbësore t’i kthejmë në motivim. Pas pushimit do të luftojmë për të gjitha trofetë: Ligën e Kampionëve, Kupën e Mbretit, Superkupën e Spanjës, La Ligën… Lojtarët do të kthehen dhe do të ecim përpara. Mendoj se jemi një ekip i mirë; duhet të jemi pozitivë dhe të punojmë fort. Nuk besoj se problemi është sistemi apo struktura. Në pjesën e parë bëmë gabime të rënda. Në pjesën e dytë u përmirësuam, por ajo tashmë ka kaluar. Duhet të nxjerrim mësime nga kjo ndeshje dhe nga ajo me PSG-në. Dhe do ta bëjmë.”
Si u zhvillua ndeshja
Barcelona pësoi golin e parë në minutën e 13-të: ish-lojtari i saj, Alexis Sánchez, shënoi nga penalltia pas faullit të kapitenit Ronald Araujo ndaj Isaac Romero. Romero realizoi edhe të dytin për Sevillan, ndërsa Marcus Rashford ngushtoi shifrat për katalanasit në shtesën e pjesës së parë. Barca kërkoi barazimin dhe pati shansin më të mirë në minutën e 76-të, por Robert Lewandowski gaboi penalltinë duke goditur jashtë. Në fund, Sevilla realizoi edhe dy herë me Jose Angel Carmona dhe Akor Adams. Ndeshja u luajt në Estadio Ramon Sanchez Pizjuan, në Sevilje, më 5 tetor 2025.
Dy humbje radhazi nën Flick
Kjo ndeshje erdhi pas disfatës 2-1 ndaj Paris Saint-Germain të mërkurën në shtëpi, duke e çuar Barcelonën në dy humbje rresht për herë të dytë që prej kur Hansi Flick mori drejtimin në verën e vitit 2024, sipas Opta. Herën tjetër ndodhi në dhjetor 2024, kur Barcelona u mund nga Leganesi dhe Atletico Madridi.
Gjendja e Marcus Rashford
Pas kontributit të tij të shtatë sezonal (tre gola dhe katër asistime), Rashford e mbylli ndeshjen me pak shqetësim fizik. Burime pranë klubit, në kushte anonimiteti, thonë se bëhet fjalë vetëm për një goditje të lehtë dhe se nuk janë të nevojshme ekzaminime shtesë.
Çfarë i pret Barcelonën pas pushimit
Pas pushimit të kombëtareve, Barcelona pret në shtëpi Girona-n dhe Olympiacos-in, përpara El Clásicos së parë të sezonit kundër Real Madridit në Bernabeu, të dielën, 26 tetor.
Barça, e tronditur fizikisht dhe mendërisht
Ashtu si në shtator, edhe pushimi i tetorit vjen në moment të përshtatshëm për ekipin e Flick. Nëse humbja ndaj PSG-së dhembi, kjo e Sevillas ka lënë shenjë edhe më të thellë. Pa Lamine Yamalin, Barçës i mungoi ai profil lojtari që e përmbys një ndeshje. Loja nuk rridhte as në mbrojtje, as në ndërtim, as në sulm; pjesa e parë ishte shumë e dobët. Edhe pse Flick vlerësoi reagimin në fraksionin e dytë, nuk mjaftoi. Sevilla, me trajnerin Matias Almeyda që gjatë gjithë javës u kishte ngulitur bindjen se mund ta mposhtnin Barçën, e besoi dhe hyri shpesh e lehtë në zonën e Szczesny-t. Ata e goditën një skuadër që në hyrje të pushimit duket e lëkundur fizikisht dhe mendërisht.
Burimi (tekst i vogël): The Athletic — Laia Cervelló Herrero