Ylli i Barcelonës, Lamine Yamal, është kritikuar ashpër nga ish-mesfushori i Real Madridit, Guti, për sjelljen e tij gjatë konferencës për shtyp pas finales së Ligës së Kombeve.
Pas humbjes së Spanjës ndaj Portugalisë me penallti në finalen e edicionit 2024/25 – pas një barazimi dramatik 2-2 – Guti reagoi ndaj paraqitjes së Jamalit para mediave.
Pavarësisht paraqitjes mbresëlënëse në gjysmëfinale kundër Francës, ku 17-vjeçari shënoi dy gola dhe u shpall lojtari i ndeshjes, vëmendja pas finales u përqendrua te një detaj jashtë fushës.
Gjatë konferencës për shtyp, Yamal u shfaq me një kapelë të vendosur me pjesën e pasme përpara – një gjest që nuk u prit mirë nga Guti, i cili foli hapur në emisionin spanjoll El Chiringuito.
“Nuk e kuptoj këtë mënyrë paraqitjeje. Nuk më pëlqen të shoh një lojtar me kapelë të kthyer mbrapsht kur përfaqëson ekipin kombëtar,” tha Guti.
“Kur të jetë me pushime në Ibiza apo kudo tjetër, mund të vishet si të dojë. Por jo në një konferencë për shtyp me përfaqësuesen.”
Edhe pse pjesëtarë të tjerë të panelit e kundërshtuan, Guti qëndroi i palëkundur në mendimin e tij dhe shtoi se, me kalimin e kohës, është bërë gjithnjë e më kritik ndaj sjelljeve të tilla.
“S’është faji i Lamine – ai bën atë që i lejohet. Faji është i atyre që duhet ta ndalojnë dhe t’i thonë: ‘Jo, me kapelë nuk dilet para shtypit kur përfaqëson Spanjën.’”
Përveç kësaj polemike, finalja nuk shkoi siç pritej për Jamalin. Ndryshe nga gjysmëfinalja, ai nuk arriti të bëjë diferencën ndaj Portugalisë, çka ka bërë që disa tifozë të shprehen se mund të ketë humbur një shans të madh për të konkurruar për Topin e Artë.