Mesazhi ndaj Kosovës
Pak para zgjedhjeve, diplomati francez thekson se partnerët ndërkombëtarë kanë nevojë për një palë të qartë në Kosovë për të punuar mbi Planin e Rritjes së BE-së, normalizimin e marrëdhënieve me Serbinë dhe agjendën e zhvillimit të vendit. Ai mirëpret heqjen e 50 për qind të masave ndëshkuese ndaj Kosovës, ndërsa mbetet i matur kur pyetet nëse do të hiqen tërësisht së shpejti.
“Na duhet një qeveri funksionale dhe me kompetenca të plota, me të cilën mund të bashkëpunojmë për Planin e Rritjes, për normalizimin me Serbinë dhe për reformimin e legjislacionit e zhvillimin e Kosovës”, thekson Guérot.
Viti pa qeveri të plotë
Kosova nuk arriti të formojë institucionet e reja pas zgjedhjeve të fundit. Duke folur për bllokadën politike, ambasadori francez thotë se periudha pa një qeveri me mandat të plotë ka qenë sfiduese për vendin. Sipas tij, megjithëse është punuar në nivel teknik – si në projektin e impiantit të trajtimit të ujërave të zeza – demokracia kërkon një qeveri që i përgjigjet Kuvendit dhe mban përgjegjësi politike.
Lehtësimi i masave dhe projektet që nxiten
Bashkimi Evropian ka vendosur të zbusë masat ndaj Kosovës me 50 për qind dhe është zotuar t’i heqë të gjitha në një afat të përcaktuar. Guérot e cilëson këtë lajm të mirë, sepse hap rrugën për projekte të rëndësishme që kishin mbetur pezull gjatë viteve të fundit.
Ai përmend një projekt madhor për ndërtimin e impiantit të trajtimit të ujërave të zeza që do të shërbejë Prishtinën, Obiliqin, Fushë-Kosovën dhe Graçanicën – një nismë e përbashkët me Gjermaninë. “Pres me padurim ta përshpejtojmë këtë projekt; puna teknike nuk është ndalur asnjëherë,” thotë ai. Po ashtu, ai përmend projektet e Agjencisë Franceze të Zhvillimit për të mbështetur Kosovën në organizimin e Lojërave Mesdhetare dhe në tranzicionin drejt energjisë më të pastër, duke theksuar problemet me ndotjen e ajrit në kryeqytet.
Zbatimi nga Komisioni Evropian
I pyetur për afatin e plotë të heqjes së masave, ambasadori thekson se vendimi politik është marrë nga Këshilli i Ministrave dhe Këshilli Evropian, ndërsa tani i takon Komisionit Evropian ta zbatojë. “Nuk mund të hyj në detaje, por vendimi politik është marrë dhe zbatimi është në dorën e Komisionit,” deklaron ai.
Sfondi i masave
Masat ndaj Kosovës u vendosën pas përshkallëzimit të situatës së sigurisë në veri, kur kryetarët shqiptarë, të zgjedhur në votime të bojkotuar nga komuniteti serb lokal, morën detyrën në komunat veriore.
Burimi: KosovaPress