Dy raste të tjera të rënda të lidhura me grupin e Ibër-Lepencit
Drejtori i Policisë së Kosovës, Gazmend Hoxha, thotë se nga grupi kriminal që kreu sulmin terrorist në kanalin Ibër-Lepenc janë zbuluar edhe dy raste të tjera serioze. Sipas tij, grupi ka vepruar për një periudhë të gjatë në Kosovë dhe paraqet një ndërmarrje të organizuar nga shërbimet sekrete të Serbisë. Ai konfirmon se po hetohen edhe dy ngjarje të tjera, pa dhënë hollësi për natyrën e tyre. I pyetur nëse ka edhe të dyshuar të tjerë për goditjen te segmenti i Varagës në Zubin Potok, Hoxha përgjigjet se po, ndërsa thekson se po ndiqen edhe pista të tjera hetimore.
Lidhjet me shërbimet sekrete të Serbisë
Hoxha bën të ditur se njërit prej të arrestuarve i është gjetur librezë ushtarake që dëshmon përfshirjen e tij në shërbimin inteligjent të Ushtrisë së Serbisë, me gradën e togerit (poruçnik). Sipas tij, kjo dokumenton lidhjen direkte me institucionet e sigurisë së Serbisë. Ai shton se janë identifikuar edhe persona të tjerë dhe se do të ndiqen edhe gjurmë të tjera hetimi. Armët, pajisjet dhe materialet e gjetura te ky grup lidhen me dy vepra të tjera të rënda që kanë ndodhur në Kosovë pas luftës, por detajet nuk bëhen publike për shkak të fazës së hetimeve dhe nevojës për koordinim me Prokurorinë Speciale. Sipas tij, nga ky grup janë zbuluar në total tre raste të rënda. Zgjedhja e cakut, njohuritë për sasinë dhe vendosjen e eksplozivit, si dhe mënyra e tërheqjes, tregojnë se bëhet fjalë për një operacion të planifikuar mirë nga struktura të shërbimeve sekrete të shtetit fqinj, me synim dëmtimin dhe destabilizimin e Kosovës.
Bashkëpunimi me FBI-në
Hoxha tregon për një bashkëpunim shumë të ngushtë me FBI-në në hetimin e këtij rasti. Për të rritur kredibilitetin e procesit, ai i është drejtuar ambasadorit amerikan në Prishtinë për mbështetjen e FBI-së. Pas kësaj, oficerë të FBI-së kanë ardhur në Kosovë, kanë monitoruar dhe asistuar hetimet. Gjatë bastisjeve në shtëpitë e të dyshuarve janë gjetur prova që lidhin të arrestuarit me shpërthimin, përfshirë gjurmë të përdorimit të eksplozivit. Laboratori i Forenzikës në Kosovë ka dokumentuar përputhje të ADN-së së gjetur në fitilin ngadalndezës me personat e arrestuar një ditë pas sulmit, ndërsa pjesë çizmesh të sekuestruara u dërguan për ekzaminim në laboratorin e FBI-së. Hoxha thotë se mikpritën mbështetje të jashtëzakonshme nga FBI dhe ambasada amerikane, sidomos pasi aktorë në Serbi tentuan të fajësonin Policinë e Kosovës, duke përdorur logjikën e diskredituar të praktikave të vjetra të strukturave të tyre të sigurisë, të ilustruara dikur edhe me çështjen e njohur si Panda në Pejë.
Rasti ndër më të rëndët për Policinë e Kosovës
Sipas Hoxhës, pas ngjarjes së Banjskës, sulmi në Ibër-Lepenc është ndër më të rëndët dhe më seriozët me të cilët është përballur Policia e Kosovës. Ai thekson se nuk bëhet fjalë për veprim të dy a tre individëve, por për një operacion të mirëplanifikuar nga struktura të sigurisë dhe shërbime inteligjente të Serbisë, duke përdorur persona nën ndikimin e tyre me qëllim të shkaktimit të dëm të madh shtetit të Kosovës, krijimit të kolapsit ekonomik e energjetik dhe prodhimit të pasigurisë totale në veri.
Hetim shumëmujor dhe reagim i shpejtë institucional
Hoxha thotë se hetimet për këtë rast kanë zgjatur me muaj. Sipas tij, qëllimi i sulmit ishte destabilizimi i tërësishëm i situatës në veri, goditja e ekonomisë dhe futja e vendit në krizë energjetike, përfshirë industrinë që furnizohet nga kanali Ibër-Lepenc, prodhimin e energjisë dhe ngrohjen qendrore që mbështetet në termocentralet Kosova A dhe Kosova B. Ai vlerëson reagimin e menjëhershëm dhe bashkërendimin e institucioneve përgjegjëse — ndërmarrjes Ibër-Lepenc, Ministrisë së Industrisë dhe Ekonomisë, Policisë së Kosovës, Ministrisë së Punëve të Brendshme dhe zjarrfikësve — të cilët arritën të parandalojnë ndërprerjen e prodhimit të energjisë dhe të sanojnë dëmet në kohë rekord.
Aktakuzë ndaj tre personave
Pas një hetimi të zhvilluar bashkë me Policinë e Kosovës dhe partnerë ndërkombëtarë, Prokuroria Speciale ka ngritur aktakuzë ndaj tre personave: Jovan Viçentijeviq, Dragisha Viçentijeviq dhe Igor Dimiviq, për sulmin ndaj infrastrukturës kritike në kanalin Ibër-Lepenc. Ata akuzohen për rrezikim të rendit kushtetues përmes shkatërrimit apo dëmtimit të instalimeve dhe pajisjeve publike, në lidhje me kryerjen e një vepre terroriste, si dhe për armëmbajtje pa leje dhe spiunazh. Shpërthimi në Ibër-Lepenc është vlerësuar nga institucionet e Kosovës si akt terrorist i orkestruar nga Serbia.
Burimi: KosovaPress