Qëndrimi ndaj njoftimit të Kushtetueses
Kryetari i Nismës Socialdemokrate, Fatmir Limaj, ka komentuar njoftimin e fundit të Gjykatës Kushtetuese, e cila ka bërë të ditur se Kuvendi i Kosovës ende nuk është konstituuar dhe se duhet të zgjidhet një nënkryetar nga komuniteti serb. Ai theksoi se Nisma Socialdemokrate vazhdon të respektojë çdo aktvendim të Kushtetueses.
“Të presim aktgjykimin e plotë të shohim saktësisht çfarë ka konstatuar Gjykata Kushtetuese dhe cilat janë udhëzimet e saj”, u shpreh Limaj në Klan Kosova.
A do të përsëritet votimi për nënkryetarët?
Sipas Limajt, mbetet për t’u parë nëse do të kërkohet përsëritja e votimit të pakos së nënkryetarëve për komunitete, apo nëse procedura do të vazhdojë vetëm me një kandidat. “Këto përgjigje i jep aktgjykimi; pasi ta lexojmë, do të marrim vendimet tona. Ajo që mund të them tani është se, si gjithmonë, ne do t’i ndjekim aktvendimet e Gjykatës Kushtetuese”, tha ai.
Përgjegjësia për ngërçin politik
Limaj vlerësoi se tri forcat më të mëdha politike në vend — Lëvizja Vetëvendosje, Partia Demokratike e Kosovës dhe Lidhja Demokratike e Kosovës — mbajnë përgjegjësinë kryesore për bllokadën institucionale që ka vijuar që nga zgjedhjet nacionale.
“Po të kemi diçka për të cilën mund të ndjehemi mirë si Nisma Socialdemokrate, është fakti që për nëntë muaj rresht kemi paralajmëruar domosdoshmërinë e një marrëveshjeje politike. Edhe pse jemi një grup i vogël, kemi provuar, jemi angazhuar dhe kemi dhënë propozime që vendi të mos shkojë drejt bllokimit të institucioneve”, u shpreh ai.
Roli i Nismës Socialdemokrate
Sipas Limajt, tri partitë kryesore kanë përgjegjësi si për situatën e krijuar, ashtu edhe për zhbllokimin e saj, për ndërtimin e institucioneve dhe gjetjen e rrugëve për një marrëveshje politike. “Fuqia jonë politike është kjo që është — me tre deputetë — dhe brenda këtij mandati do të luajmë rol sa më konstruktiv. E dimë që pesha jonë është e kufizuar”, shtoi ai.
Burimi: Gazeta Express