Manchester United ka zyrtarizuar largimin e 10 lojtarëve, të cilëve do t’u përfundojë kontrata pas përfundimit të këtij sezoni, pas një edicioni zhgënjyes për klubin.
Mes emrave më të spikatur që do të ndahen nga “Djajtë e Kuq” janë Christian Eriksen, Victor Lindelof dhe Jonny Evans – ky i fundit një ish-fitues i trefishtë i Premier League dhe kampion i Ligës së Kampionëve gjatë periudhës së tij të parë në Old Trafford.
Eriksen shënoi në paraqitjen e tij të fundit për klubin, duke realizuar një penallti në fitoren 2-0 ndaj Aston Villas në javën e fundit të Premier League. Largimi i tij ishte i pritshëm prej kohësh.
Në të njëjtën listë largohet edhe kapiteni i Suedisë, Victor Lindelof, i cili nuk arriti të gjejë qëndrueshmëri gjatë shtatë viteve në Manchester United, pas transferimit të tij prej 45 milionë eurosh nga Benfica në vitin 2017.
Edhe portieri rezervë Tom Heaton është përfshirë në listën e largimeve, megjithëse ai vazhdon të jetë në negociata me klubin për një marrëveshje të re.
Lista plotësohet nga disa lojtarë të akademisë: Hubert Graczyk, Jack Kingdon, Sam Murray, Tom Myles, James Nolan dhe Tom Wooster.