Seanca në Gjykatën Themelore të Prishtinës
Në procesin gjyqësor për krime lufte ndaj Momir Pantiq dhe Zharko Zariq, është marrë në pyetje dëshmitari i Prokurorisë, Haxhi Beqiraj. Ai rrëfeu se gjatë largimit në kolonë nga shtëpitë, u ndalua nga policia serbe ku, sipas tij, bënte pjesë edhe i akuzuari Pantiq.
Dëshmia e Haxhi Beqirajt
Beqiraj tha se atë pranverë u detyruan të braktisnin shtëpitë pas lajmeve se zona po rrethohej dhe se të gjithë rrezikonin jetën. Sipas tij, ishte mbi një traktor kur u përball me Pantiqin, i cili e ndali dhe e pyeti për djemtë, duke aluduar në radhët e UÇK-së. Ai shtoi se familjarët e tij ishin përballur me maltretime që prej kohësh.
Djegia e shtëpive dhe prania e policisë
Pas dëbimit të banorëve, dëshmitari theksoi se shtëpia e tij dhe ato të dy vëllezërve u dogjën. Ai tha se në zonë kishte forca të shumta policore serbe dhe se përgjegjësia kryesore, sipas tij, i takonte Pantiqit si shef. Beqiraj nënvizoi se nuk kishte ushtri, por vetëm polici, dhe se praninë e tyre e shihje kudo.
Dhunë fizike dhe të vrarë
Dëshmitari përmendi edhe një episod dhune, duke identifikuar Millosh Stojkoviqin si personin që e goditi me shuplakë, me fjalët se ishte një “dhuratë” për të mos e harruar kurrë. I pyetur për viktima, ai pohoi se aty ishin vrarë rreth 11 persona, të masakruar pranë një bregu, duke theksuar se në vendngjarje kishte qenë edhe Pantiqi.
Pretendimet e aktakuzës
Sipas Prokurorisë Speciale të Republikës së Kosovës, ish-kryeshefi i stacionit policor në Istog, Momir Pantiq, dhe ish-polici Zharko Zariq akuzohen se në bashkëkryerje kanë kryer veprën penale krim lufte kundër popullsisë civile.
Ngjarjet në Dubravë, sipas aktakuzës
Aktakuza, e siguruar nga Betimi për Drejtësi, përshkruan se në fshatin Dubravë, saktësisht në burgun e Dubravës, pas bombardimeve të NATO-s ku humbën jetën tre të burgosur shqiptarë, Pantiq në cilësinë e kryeshefit të stacionit policor, bashkë me forcat policore serbe dhe me pjesëmarrjen e gardianëve, hynë në dhomat e të burgosurve dhe ushtruan dhunë sistematike, duke i rrahur në mënyrë mizore e çnjerëzore vetëm pse ishin shqiptarë. Më pas, bombardimet vijuan, duke shkaktuar vdekjen e 18 të burgosurve shqiptarë dhe plagosjen e dhjetëra të tjerëve.
Sipas aktakuzës, ditë më vonë në mëngjes, gardianë dhe persona të armatosur serbë, së bashku me forcat policore dhe Njësitë Speciale nën komandën e Stacionit Policor në Istog, fillimisht i mblodhën të burgosurit shqiptarë në fushën e sportit dhe më pas hapën zjarr me armë të ndryshme, ndërsa nga muri i burgut u hodhën edhe granata drejt tyre.
Dhunim seksual dhe akuza të tjera
Po sipas aktakuzës, forcat policore serbe të Stacionit Policor në Istog, nën udhëheqjen e Pantiqit, rrëmbyen një civil shqiptar me pseudonimin A1 dhe e dhunuan seksualisht. Përshkruhet edhe dhunimi i një viktime tjetër, e identifikuar si B1. Dy të pandehurit akuzohen gjithashtu për vrasjen e disa familjeve në Komunën e Istogut.
Burimi: Betimi për Drejtësi