Nënë dhe vajzë e mitur, të lënduara nga therja me thikë në Prizren, janë në gjendje të rëndë shëndetësore dhe po trajtohen në Mjekimin Intensiv Qendror të Spitalit të Përgjithshëm të Prizrenit.
Gjendja shëndetësore dhe trajtimi
Shefi i Emergjencës në këtë spital, Hekuran Veçgishti, konfirmoi për KosovaPress se të dyja të lënduarat kanë plagë në pjesë të ndryshme të trupit. Sipas tij, pas ekzaminimeve të nevojshme, përfshirë ato radiologjike, ato u hospitalizuan për ndërhyrje kirurgjikale dhe aktualisht po mbahen nën kujdes intensiv.
Çfarë ndodhi sipas Policisë
Mbrëmë rreth orës 00:45, Policia e Kosovës u njoftua për një rast dhune në familje. Në vendngjarje, në rrugë, policia gjeti një grua (bashkëshorten e të pandehurit) me lëndime trupore dhe gjakderdhje të shkaktuara nga një mjet i mprehtë. Asaj iu dha ndihma e parë nga zyrtarët policorë deri në ardhjen e ekipit të emergjencës mjekësore.
Në katin e fundit të ndërtesës u gjet edhe vajza e mitur, e cila po ashtu kishte lëndime dhe gjakderdhje. Ajo mori ndihmën e parë dhe, bashkë me nënën, u dërgua për trajtim në Spitalin e Përgjithshëm (Rajonal) të Prizrenit.
Masa ndaj të dyshuarit
Sipas Prokurorisë Themelore të Prizrenit, gjatë intervenimit të policisë në hyrje të banesës u identifikua dhe u arrestua i dyshuari, i cili u shoqërua në stacionin policor për procedura të mëtejshme. Prokurori kujdestar lëshoi aktvendim për ndalimin e tij për 48 orë, me dyshimin se ka kryer veprat penale “Vrasja e rëndë në tentativë” dhe “Mbajtja në pronësi, kontroll ose posedim të paautorizuar të armëve”. Brenda afatit ligjor, Prokuroria do të paraqesë kërkesë për caktimin e masës së paraburgimit.
Burimi: KosovaPress