“Jo për Qeveri, suksese ty”
Nisma: vetëm partneritet në Kuvend
Tre votat e Nismës Socialdemokrate, që Albin Kurti i kishte llogaritur si të sigurta, nuk janë për qeveri. Kështu bëri të ditur anëtari i Kryesisë së Nismës, Bilall Sherifi, në emisionin “Pressing” në T7, një ditë pas zgjedhjes së Dimal Bashës kryetar të Kuvendit dhe pak ditë para skadimit të afatit kushtetues për formimin e qeverisë, të dielën.
Sipas Sherifit, Fatmir Limaj ia ka bërë të qartë Kurtit në takimin e fundit – para dhe pas zgjedhjes së Bashës – se tri votat e Nismës nuk janë për këmbim-marrëveshje qeveritare. “Pas atij takimi, z. Limaj mblodhi Kryesinë e Nismës dhe u vendos: jo pjesëmarrje në Qeveri, vetëm bashkëpunim në Kuvend. Që nga ai moment, s’ka pasur ndryshim”, tha ai. Sherifi shtoi se edhe pas zgjedhjes së Bashës, Kurti provoi të kontaktonte Limajn, por përgjigjja e këtij të fundit ishte se, meqë nuk u konkretizua partneriteti në Kuvend, ai nuk është i interesuar për qeveri dhe i uroi “suksese” Kurtit.
Kurtit i mungojnë votat
Në maksimum, Kurti ka mundur të mbledhë deri në 56 vota – pesë më pak se 61 sa duhen për miratimin e qeverisë – dhe edhe ato do ta bënin kabinetin tepër të brishtë, duke e lënë në mëshirën e 11 deputetëve të pakicave jo-serbe dhe tri votave të Nismës.
Vetë Kurti, një ditë më parë, la të kuptohet se të dielën nuk i ka numrat, duke folur për “intoksikim të atmosferës”, “inat e xhelozi” dhe duke pranuar se alternativa mund të jenë zgjedhjet e reja: “Nuk është e lehtë… atmosfera është shumë e intoksikuar, ka më shumë xhelozi, inat e cinizëm se sa ide, punë e pasion. Do të përpiqemi ta bëjmë qeverinë, por, siç duket, alternativa janë zgjedhjet.”
Kushtet e Nismës dhe qëndrimet e deputetëve të pakicave
Deputetja e Nismës, Arbëreshë Krasniqi, konfirmoi se nuk ka pasur bisedime me Kurtin dhe se kërkesa e tyre mbetet e pandryshuar: e vetmja mënyrë për të ofruar bashkëpunim për LVV-në është të lëvizet nga pozicioni i kryetarit të Kuvendit.
Ndërkohë, Duda Balje, Veton Berisha dhe Adem Hoxha mbeten jashtë llogarisë së Vetëvendosjes – dhe, sipas tyre, edhe pa kontakt. “Jo, ende askush nuk më ka kontaktuar,” tha Balje, e cila theksoi se qëndrimi i saj ndaj një qeverie të Kurtit “nuk ka ndryshuar” dhe nuk beson se do të ndryshojë. As Veton Berisha nga komuniteti egjiptian nuk ka njoftuar për kontakte apo marrëveshje. Adem Hoxha, ndërkaq, ka rigravituar te grupi parlamentar i Listës Serbe.
Nga radhët e VV-së dhe partnerëve të saj ka pak besim se qeveria e re do të formohet. Deputetja boshnjake Emilja Rexhepi, rivale e Duda Baljes, tha se ajo do të votojë për qeverinë e re të propozuar nga Kurti, por shtoi se “nuk e di nëse do të formohet”.
Partnerët e VV: skepticizëm për qeverinë, më shumë prirje për zgjedhje
Mimoza Kusari-Lila theksoi se “disa bisedime” janë zhvilluar, por se për këtë duhet të flasë kryetari i LVV-së. Sidoqoftë, si kryetare e Alternativës, ajo u shpreh se zgjidhja më e mirë do të ishin zgjedhjet e reja, për të rikërkuar konfirmimin e besimit të qytetarëve pas një periudhe të gjatë nga zgjedhjet e fundit.
Bajqinovci optimist: beson në Qeverinë Kurti III
Deputeti i VV-së, Mefail Bajqinovci, tha për Gazeta Blic se “beson” se Qeveria Kurti III do të bëhet. Sipas tij, LVV “nuk po zhagitet” dhe po synon ta formojë qeverinë “me Nismën dhe disa deputetë të caktuar”. Ai shtoi se gjithçka mbetet në diskrecionin e mandatarit dhe u bëri thirrje opozitës dhe deputetëve të mos e çojnë vendin në zgjedhje “për teke”, por të vijojë qeverisja.
Burimi: T7 (Pressing), Front Online, Gazeta Blic