Operacioni “Rrjeti”
Pas tetë muajsh hetime, u finalizua operacioni policor ndërkombëtar “Rrjeti”, duke çmontuar një grup kriminal që trafikonte vajza nga vendet e Amerikës Latine dhe Azisë Qendrore, me synim shfrytëzimin e tyre për prostitucion në Shqipëri.
Arrestimet dhe bashkëpunimi ndërkombëtar
Policia e Shtetit, në bashkëpunim me Prokurorinë, Policinë Kombëtare të Kolumbisë, Policinë kroate, si dhe me mbështetjen e EUROPOL dhe EUROJUST, arrestoi 7 nga 9 anëtarët e grupit kriminal. Në Shqipëri u ekzekutuan masa sigurie për 9 persona, 7 prej tyre me masën “arrest në burg”. Organizatori i grupit, një shtetas kolumbian, u kap në Kolumbi. Dy persona të tjerë, pjesëtarë të grupit, janë shpallur në kërkim. Gjithashtu, 48 shtetase të huaja po procedohen penalisht për ushtrim prostitucioni.
Hoteli i identifikuar
Gjatë veprimeve hetimore u zbulua një hotel në rrugën “Reshit Collaku” në Tiranë, ku strehoheshin dhe shfrytëzoheshin për prostitucion disa prej shtetaseve të huaja.
Sekuestrimet
U sekuestruan shuma parash, 7 aparate celularë dhe prova të tjera materiale me vlerë për hetimin.
Roli i të dyshuarve, sipas hetimeve
– Shtetasi L. B. dyshohet se kishte rolin kryesor në rekrutimin e vajzave nga Amerika Latine, si dhe në organizimin e udhëtimit dhe akomodimit të tyre në Shqipëri. Pasi mbërrinin, ato detyroheshin të ushtronin prostitucion; në rast refuzimi, ndaj vajzave dhe familjarëve të tyre në Kolumbi ushtroheshin presione dhe kërcënime.
– L. B. bashkëpunonte me shtetasin D. S. për sigurimin e kushteve të akomodimit dhe administrimin e rrjetit të prostitucionit.
– Shtetasi I. G. kishte përshtatur një hotel në rrugën “Reshit Collaku” si vend strehimi dhe shfrytëzimi për prostitucion.
– Shtetasit A. A. dhe K. N. shfrytëzonin për prostitucion disa shtetase nga Kazakistani, të cilat i mbanin në këtë hotel.
– Shtetasi D. B. u siguronte disa vajzave lëndë narkotike dhe gjente klientë për shërbime seksuale.
– Shtetasi K. P. (i arrestuar më herët) mblidhte të ardhurat e aktivitetit kriminal dhe i transferonte përmes kriptovalutave në llogaritë e L. B.
Burimi: Gazeta Express