Një nga yjet e Real Madridit dëshiron një bisedë direkte me trajnerin e ri, Xabi Alonso, përpara se të marrë një vendim për të ardhmen e tij.
Alonso ka nisur zyrtarisht detyrën si trajner i Real Madridit këtë javë, duke zëvendësuar Carlo Ancelottin.
Gjatë muajit qershor, Real Madridi do të marrë pjesë në turneun parasezonal në SHBA, ku do të përballet me Al Hilal, Pachuca dhe Salzburg në fazën e grupeve.
Klubi madrilen ka kryer tashmë disa përforcime para nisjes së turneut, duke transferuar Trent Alexander-Arnold nga Liverpooli dhe Dean Huijsen nga Bournemouth. Priten edhe afrime të tjera, ndërkohë që disa lojtarë mund të largohen.
Një nga emrat që mund të largohet është Rodrygo. Ai është përfolur për një transferim të mundshëm te Arsenal, ndërsa edhe Chelsea po ndjek nga afër situatën e tij.
Mikel Arteta është i vendosur të përforcojë skuadrën e Arsenalit për sezonin 2025/26, me synimin për ta ngushtuar diferencën me Liverpoolin, që sezonin e kaluar përfundoi kampionatin para tyre në Premier League.
Trajneri spanjoll e ka identifikuar Rodrygon si një objektiv të rëndësishëm, ndërsa sipas The Athletic, sulmuesi brazilian është kontaktuar tashmë nga ndërmjetës të disa klubeve angleze.
Arsenali beson se Rodrygo mund t’i japë një dimension të ri repartit ofensiv të ekipit.
