Profesori amerikan i marrëdhënieve ndërkombëtare në Universitetin Johns Hopkins, Daniel Serwer, ka kritikuar ashpër pretendimet e ish-presidentit amerikan, Donald Trump, se kishte parandaluar një luftë midis Kosovës dhe Serbisë. Në një artikull të publikuar të dielën në platformën ‘Truth Social’, Trump kishte pretenduar se gjatë kohës së tij në detyrë kishte shmangur një konflikt të armatosur mes dy shteteve. Sidoqoftë, Serwer e shpalli këtë deklaratë si të rreme dhe paralajmëroi se angazhimi i Trumpit në Ballkan mund të ketë pasoja edhe më të rënda. ‘Çdo përpjekje që ai ndërmerr tani mund të jetë shkaktar i dëmeve të mëdha, për shkak te tendencës së tij për të ndarë Kosovën,’ shprehet Serwer.
Ai thekson se Ballkani është tronditur në veçanti pasi Trump e ka përmendur rajonin dhe, sipas planeve që po shqyrtohen nga rrethi i ish-presidentit amerikan, mund të propozohet një marrëveshje për shkëmbim të territoreve mes Kosovës dhe Serbisë. ‘Pëshpëritësi i tij për Ballkanin, Ric Grenell, mendon se kjo është një ide fantastike. Ai propozon një shkëmbim territorial ku veriu me shumicë serbe të Kosovës do të kalonte në Serbi, dhe komunat me shumicë shqiptare në jug të Serbisë do të kalonin në Kosovë. Kjo mund të duket e përshtatshme, veçanërisht në qoftë se je nacionalist etnik. Trump dhe Grenell janë nacionalistë etnikë të përkushtuar të tipit supremacist i bardhë’, shkruan Serwer. Megjithatë, sipas tij, ky plan nuk pranohet nga Serbia. ‘Ata do të donin të mbajnë të gjithë jugun e Serbisë, përmes së cilit kalon një rrugë kyçe për në Selanik dhe për në Mesdhe. Prandaj, Beogradi është i përkushtuar për të larguar shqiptarët nga kjo zonë’, vijon Serwer.
Ai paralajmëron se Kosova nuk duhet të përfshihet në asnjë bisedë për shkëmbim territoresh. ‘Kryeministri Kurti, ose pasuesi i tij, do të ishte i mençur të mos pranonte diskutime për shkëmbim territoresh në agjendën e tij,’ këshillon Serwer. Profesori amerikan shton se edhe për një president të SHBA-së me kapacitete të plota do të ishte e vështirë të merrej me çështjet e Ballkanit, ndërsa një president si Trump, sipas tij, është i paaftë për të ofruar zgjidhje. ‘Një president i paqëndrueshëm si Trump nuk mund të bëjë gjë tjetër veçse të marrë merita për gjëra që nuk i ka realizuar dhe të premtonte më shumë. Por dështon gjithkund: Gaza, Irani, Ukraina dhe tregtia janë të gjitha në kaos’, shkruan ai.
Në këtë kontekst, Serwer u bën thirrje palëve në Ballkan të mos kërkojnë ndihmë nga personazhe si Trump apo Grenell. ‘As Serbisë dhe as Kosovës nuk u duhet ndihma nga njerëz si Ric Grenell apo Donald Trump,’ thekson ai. Serwer shprehet skeptik gjithashtu për dialogun politik të zhvilluar deri më tani nën ndërmjetësimin e BE-së, duke e cilësuar atë si të pasuksesshëm. ‘Dialogu politik që nga viti 2013 ka sjellë pak ose asnjë rezultat. Ndërkohë, dialogu teknik që e parapriu atë ka sjellë më shumë sukses: një kod telefonik për Kosovën, njohja e ndërsjellë e dokumenteve, rregullimi i pagesave për energjinë elektrike dhe kontrolli i integruar i kufijve – këto kanë qenë arritje të vërteta për qytetarët,’ shkruan Serwer. Ai shton se Beogradi duhet të gjejë një mënyrë për të rifilluar procesin e anëtarësimit në BE, duke përfshirë edhe zbatimin e marrëveshjes së arritur në vitin 2023, të cilën presidenti serb, Aleksandar Vuçiq, ka refuzuar të nënshkruajë.
Në përfundim, Serwer kërkon që BE-ja të përshpejtojë heqjen e sanksioneve të padrejta ndaj Kosovës. ‘Kosova vazhdon të vuajë nga sanksionet e pangjashme të BE-së për veprime që askush sot nuk i mbaj mend. Brukseli ka filluar procesin e heqjes së tyre dhe duhet ta përfundojë sa më shpejt,’ përmbyll ai.