Vendimi i Supremes
Gjykata Supreme ka pranuar pjesërisht kërkesën për mbrojtje të ligjshmërisë të paraqitur nga avokati Besnik Berisha në emër të të dënuarit Besart Gashi. Me këtë vendim, Supremja e hoqi gjobën prej 1 mijë eurosh dhe e ricilësoi veprën penale të “Keqpërdorimit të detyrës/pozitës zyrtare” nga neni 414 në nenin 422. Dënimi me 15 muaj burgim me kusht mbetet në fuqi.
Çfarë i vihej në barrë
Sipas aktakuzës, Gashi, si zyrtar në Qendrën për Regjistrimin e Automjeteve (QRA) në Malishevë, kishte kryer 623 shkelje gjatë procedurave të regjistrimit të automjeteve, duke i shkaktuar Komunës së Malishevës dëm prej 5,700 eurosh.
Vendimet e mëparshme
Gjykata Themelore në Gjakovë e kishte dënuar fillimisht me 15 muaj burgim dhe 4 mijë euro gjobë, si dhe me ndalim të ushtrimit të funksioneve në administratë publike apo shërbim publik për 2 vite. Gjykata e Apelit e ndryshoi këtë vendim, duke e lënë dënimin në 15 muaj burgim me kusht dhe duke e ulur gjobën në 3 mijë euro. Pas kërkesës për mbrojtje të ligjshmërisë, Supremja hoqi gjobën prej 1 mijë eurosh dhe la në fuqi burgimin me kusht.
Arsyetimi i Gjykatës Supreme
Kolegji gjykues, i përbërë nga Rasim Rasimi (kryetar), Mejreme Memaj dhe Agim Maliqi (anëtarë), konstatoi se aktgjykimi i shkallës së parë është i qartë, i argumentuar dhe i mbështetur në prova. Nga shkresat e lëndës del pa dyshim se i dënuari ka kryer këto shkelje:
– 560 regjistrime automjetesh pa pagesën e taksës komunale;
– 41 raste me parregullsi në dokumentacionin e patentë-shoferit dhe letërnjoftimit;
– 5 regjistrime me kontroll teknik të skaduar;
– 4 raste me mungesë të librezës së origjinës së automjetit.
Gjykata vuri në dukje se, edhe pse në dispozitiv mund të ketë pasur paqartësi lidhur me ndonjë përfitim pasuror të drejtpërdrejtë të të dënuarit, kjo nuk e bën aktgjykimin të pavlefshëm për t’u anuluar.
Ricilësimi dhe heqja e gjobës
Supremja theksoi se veprimet e përshkruara janë kryer si para, ashtu edhe pas hyrjes në fuqi të Kodit të ri Penal; nga numri i përmendur i regjistrimeve, vetëm rreth 50 raste bien nën kohën e zbatimit të Kodit të ri, ndërsa pjesa tjetër nën Kodin Penal të vitit 2013. Duke qenë se vepra u ricilësua sipas ligjit penal të vitit 2013, i cili nuk parashihte dënim me gjobë për këtë dispozitë, gjykata hoqi gjobën prej 1,000 eurosh dhe la në fuqi dënimin me kusht.
Pretendimet për falsifikim të dokumentit
Supremja nuk i pranoi pretendimet e mbrojtjes lidhur me veprën e “Falsifikimit të dokumentit zyrtar”. Nga dëshmitë rezulton se i dënuari ka qenë i vetëdijshëm për ndryshimin e dokumentit origjinal të automjetit. Për ekzistencën e kësaj vere penale është i parëndësishëm fakti nëse veprimi është bërë me kërkesë të dikujt tjetër, me qëllim përfitimi apo për përdorim personal ose nga persona të tretë.
Qëndrimet e palëve
Mbrojtja kërkoi që i dënuari të lirohet nga akuza, ose që çështja të kthehet në rigjykim. Prokurori i Shtetit propozoi që kërkesa të refuzohet si e pabazuar. Supremja e vlerësoi kërkesën pjesërisht të bazuar, vetëm sa i përket kualifikimit juridik dhe gjobës.
Shënim
Aktakuza e plotë është publikuar nga “Betimi për Drejtësi”.
Burimi: Betimi për Drejtësi / Gazeta Express